Հեղինե Մարգարյանի բլոգը: Հայ Քրիստոնյա

Արծիվն ու Բզեզը

HAYQRISTONEA — Mon, 09 Sep 2013 14:31:03 GMT

Արծիվն ընկավ նապաստակի հետևից: Նապաստակը տեսավ, որ ոչ մի տեղից օգնություն չկա, դիմեց իրեն պատահած միակ արարածին` աղբի բզեզին: Բզեզը նապաստակին սիրտ տվեց և, իր առջև արծվին տեսնելով, խնդրեց ձեռք չտալ իրեն ապավինողին: Բայց գիշատիչը նույնիսկ ուշադրություն չդարձրեց այդպիսի մի չնչին պաշտպանի վրա և նապաստակին խժռեց: Բզեզն այդ վիրավորանքը չմոռացավ. նա աչքը չկտրեց արծվի բնից և ամեն անգամ, հենց որ արծիվը ձու էր ածում, բարձրանում էր, ձվերը բնից դուրս էր գլորում ու ջարդում: Արծիվը, վերջապես, ոչ մի տեղ հանգիստ չգտնելով, ապաստան փնտրեց Զևսի մոտ և խնդրեց մի ապահով տեղ տալ իրեն, որ ձու ածի: Զևսն արծվին թույլ տվեց, որ ձվերն իր գոգը դնի: Բզեզն այդ տեսնելով, կոլոլեց աղբի գուղձը, թռավ հասավ Զևսին, և գուղձը գցեց նրա ծոցը: Զևսը նստած տեղից վեր թռավ, որպեսզի աղբը իր վրայից թափ տա, և արծվի ձվերը ցած գցեց: Ասում են այդ պահից, երբ աղբի բզեզները դուրս են գալիս, արծիվները այդ նույն ժամանակ բույն չեն հյուսում:
Առակս ցուցանե, որ ոչ մեկին չպետք է արհամարհել, քանզի ոչ ոք այնքան անզոր չէ, որ վրեժ չլուծի վիրավորանքի համար:

Եզոպոս

ԽՏԱՑՈՒՄՆԵՐ

HAYQRISTONEA — Fri, 23 Aug 2013 07:20:22 GMT

Ապրում եմ աշխարհում և ամեն օր համոզվում, որ ժամանակը մարդուն տվել են քոռուփուչ անելու համար:

***
Վայ այն հոգևորականին, որ կարծում է, թե <վարդապետ> բառի հիմնական իմաստը վերջին վանկի մեջ է:

***
Հարստությունը երբեք չի միավորում մարդկանց: Այն գրեթե միշտ բաժանում է:

***
Որպեսզի չարակամ ու թշնամի ունենաս, քեզնից ինչ-որ բան պիտի ներկայացնես:

***
Մեծ քիթ ունենալը ոչնիչ: Դժբախտությունը քթի ծակ չունենալն է:

***
Երբ դու ուրիշների հայրենիքներին ծանոթ չես, քո հայրենիքը միշտ էլ դժոխք կամ դրախտ կարող է թվալ քեզ:

***
Արձաններին մի մեղադրեք քարացած լինելու համար: Կանգնեցնողներն են մեղավոր:

***
Մի պարծենա: ճանճն այնպիսի կենդանի է, որ կարող է նստել ցանկացած մարդու վրա:

***
Դժվար չէ շատ խելացի երևալը: Դժվարը այդպիսին լինելն է:

***
Երբեք մի վերցրու քեզ նետած այն ձեռնոցը, որը նետողի ձեռքերը կեղտոտ են:

***
Որդի տեսանկյունից նայիր աշխարհին և կհասկանաս մարդ լինելու անհեթեթությունը:

***
-Սիրիր մերձավորիդ,- պատվիրեց Աստված:
-Սիրիր մեծավորիդ,- պատվիրանը նենգափոխեց քծնողը:

Հրաչ ԲԵԳԼԱՐՅԱՆ

Ինչի ջատագովն էր` դրանից էլ պատժվեց…

HAYQRISTONEA — Thu, 11 Jul 2013 19:18:50 GMT

Նա ասաց.
-Ինձ շատ կանայք են դուր գալիս: Ես չեմ կարող միայն մեկի հետ լինել:
Նե ի պատասխան ժպտաց:
Նա ասաց.
Ես իմ գլխի տերն եմ: Ես ազատ եմ և ոչ ոքի ոչինչ պարտավոր չեմ:
Նե ծխեց և աչքերը խոնարհեց:
Նա ասաց.
Ինձ դուր են գալիս կանայք, որոնք հասկանում են ինձ և գնհատում են իմ ազատությունը:
Նե քմծիծաղ տվեց ու դուրս փչեց ծուխը:
Նա ասաց.
-Արի լավ ժամանակ անցկացնենք, դու ինձ դուր ես գալիս:
Նե հանգցրեց ծխախոտը և նայեց նրա աչքերին:
Նա հասկացավ, որ նե չի առարկում:
Նա հարցրեց.
-Դու հավանաբար, շա՞տ տղամարդիկ ես ունեցել:
Նե գրկեց ու ամուր սեղմեց նրան:
Նա հարցրեց.
-Ինձ հետ լավ ես զգո՞ւմ:
Նե փակեց աչքերն ու համբուրեց նրան:
Առավոտյան հեռանալիս նա ասաց.
-Ամեն ինչ հրաշալի էր, միայն թե սա թող մեր մեջ մնա:
Նե ձեռքը մեկնեց և նրա ուսի վրայից հեռացրեց անտեսանալի փոշեհատիկը:
Նա ասաց.
-Ես կզանգահարեմ քեզ:
Նե գլխով արեց և փակեց դուռը:
Նա այդ նույն օրը երեկոյան զանգահարեց:
Նե տանը չէր:
Նա կարողացավ նրա բջջային հեռախոսին զանգահարել միայն ուշ գիշերը:
Նե թույլ տվեց իր մոտ գալ միայն մեկ շաբաթ անց:
Նա հարցրեց.
-Դե՞ ինչպե՞ս էիր զվարճանում առանց ինձ:
Նե ժպտաց և նրան սուրճ առաջարկեց:
Նա գրեթե ամեն օր զանգահարում էր:
Նե երբեմն պարզապես չէր վերցնում լսափողը:
Նա գալիս էր միայն այն ժամանակ, երբ նե թույլ էր տալիս:
Նե չէր բացատրում, թե իր թույլատվություններն ինչու են այդքան հազվադեպ:
Նա հասկացավ, որ միայն այդ կնոջ հետ է ուզում լինել:
Նա նյարդայնանում էր, երբ նե չէր պատասխանում զանգերին:
Նա իրեն կորցնում էր, երբ իմանում էր, որ նրան տեսել են ուրիշի հետ:
Նա ցանկանում էր, որ իրենց կապի մասին իմանան բոլորը:
Նե դեմ էր:
Նա ցանկանում էր, որ նե միայն իրենը լինեի:
Նա եկավ կարմիր վարդերի հսկայական փնջով:
Նե վերցրեց ծաղիկները, բայց խնդրեց այլևս առանց թույլատվության չգալ:
Նա ցանկանում էր, որ նե իր կինը դառնա:
Նե ասաց.
-Ես անկախ եմ, իմ գլխի տերը:
Նա ծխեց, և նրա ձեռքերը դողում էին:
Նե ասաց.
-Ես ազատ եմ:
Նա հանկարծ սառեց:
Նե ասաց.
-Ես ոչ ոքի ոչինչ պարտավոր չեմ:
Նրան թվաց, թե իր սիրտը կանգ առավ:
Նե ասաց.
-Ես չեմ պատրաստվում որևէ բան փոխել:

Հրաչյա Ամիրյան
Ապրելու արվեստը գրքից

Եվան ու օձը

HAYQRISTONEA — Sat, 06 Apr 2013 15:26:50 GMT

Եվան զբոսնում էր Եդեմական այգում, երբ օձը մոտեցավ նրան:

-Կեր այս խնձորը,-ասաց նա:

Աստծո կողմից ուսուցանված Եվան հարաժարվեց:

-Կեր այս խնձորը,-պնդում էր օձը:-Եթե ուտես, ապա դու ավելի գեղեցիկ կդառնաս քո ամուսնու համար:

-Ինձ դա հարկավոր չէ, ասաց Եվան:-Նա ինձնից բացի ուրիշ ոչ ոք չունի:

Օձը ծիծաղեց:

-Իհարկե ունի:

Քանի որ Եվան չհավատաց նրան, օձը նրան տարավ դեպի բլուրը, որտեղ ջրհոր կար:

-Նա այնտեղ է, ներքևում:Հենց այստեղ է Ադամը թաքցրել նրան:

Եվան նայեց ներքև և ջրում արտացոլված գեղեցիկ կին տեսավ:Այնուհետև նա կերավ օձի առաջարկած խնձորը:

Հյուսիսամերիկյան հնդկացիների իմաստություններից

HAYQRISTONEA — Fri, 15 Mar 2013 18:44:46 GMT

Երբ կտրվի վերջին ծառը, երբ թունավորվի վերջին գետը, երբ բռնվի վերջին թռչունը, միայն այդ ժամանակ դուք կհասկանաք, որ փողը հնարավոր չէ ուտել:

Ձգտիր իմաստության, այլ ոչ թե գիտելիքների: Գիտելիքները անցյալն են: Իմաստությունն ապագան է:

Ամերիկացիները տարօրինակ մարդիկ են, նրանք գլխով են մտածում: Իսկ մենք` հնդկացիներս, սրտով ենք մտածում:

Երբ սպիտակ մարդը եկավ, մենք հողեր ունեինք, իսկ նա` Աստվածաշունչ: Հիմա նա ունի մեր ամբողջ հողը, իսկ մենք` միայն Աստվածաշունչ:

Երբ դու ծնվեցիր, դու լաց էիր լինում, իսկ աշխարհը ծիծաղում էր: Ապրիր այնպես, որ մեռնելիս դու ծիծաղես, իսկ աշխարհը լաց լինի:

Թշնամին միշտ չէ, որ թշնամի է, իսկ բարեկամը` բարեկամ:

Եթե դու խոսես բուերի կամ օձերի հետ, նրանք կխոսեն քեզ հետ, և դուք կճանաչեք մեկմեկու: Եթե դու չխոսես նրանց հետ, դու նրանց չես ճանաչի, իսկ այն ինչը դու չես ճանաչում, քեզ վախեցնում է: Մարդը կործանում է այն, ինչից վախենում է:

Երկրի երեսին ամեն ինչ իր նպատակն ունի, ամեն մի հիվանդություն` իրեն բուժող դեղը, իսկ ամեն մարդ` իր կոչումը:

Հոգին ծիածան չի ունենա, եթե աչքերում արցունք չի եղել:

Լավ ասված խոսքը, դիպուկ նետված կացնից լավ է:

Մենք աղքատ ենք, որովհետև մենք ազնիվ ենք:

Հարց տուր քո սրտից և պատասխանը կլսես սրտից:

Մի դատեք մարդուն, քանի դեռ երկու լուսին նրա մոքասիներով չեք քայլել:

Հիշի'ր, որ մարդը նույնպես կենդանի է, միայն թե խելացի:

Գորտը չի խմում այն լճակը, որում ապրում է:

Որպեսզի լսես ինքդ քեզ, լռակյաց օրեր են պետք:

Ասույթների հեղինակները հնդկացի առաջնորդներ են:
Հայացք դեպի ներս
Հրաչյա Ամիրյան

ԿՅԱՆՔԻ ՄԱՍԻՆ

HAYQRISTONEA — Mon, 04 Mar 2013 13:02:07 GMT

Կյանքը չի դադարում զվարճալի լինելուց, երբ մենք մահանում ենք, և չի դադարում լուրջ լինելուց, երբ մենք ծիծաղում ենք:

Բեռնարդ Շոու

Ինչպես լավ ապրած օրն է բերում երջանիկ քուն, այնպես էլ լավ ապրած կյանքը բերում է երջանիկ մահ:

Լեոնարդո դա Վինչի

Կյանքի նպատակն էլ հենց դրանում է՝ ապրել այնպես, որպեսզի մահից հետո էլ չմեռնես:

Մուսա Ջալիլ

Ի՞նչ եք կարծում՝ լա՞վ եմ ես խաղացել իմ կյանքի կատակերգությունը:

Օկտավիանոս Օգոստոս

Մարդու կյանքը նման է լուցկու տուփի: Նրան լուրջ վերաբերվել՝ ծիծաղելի է: Վերաբերվել անլուրջ՝ վտանգավոր է: Ռյունոսկե Ակուտագավա

Կյանքի մեծ հարցը՝ ինչպես ապրել մարդկանց մեջ:

Ալբեր Քամյու

Շատ մարդիկ մահանում են, այդպես էլ իրենց ողջ երկար կյանքի ընթացքում չասելով ոչ մի խելացի բառ և չկատարելով ոչ մի բարի գործ: Այդքանով հանդերձ նրանք բողոքում են, որ կյանքը կարճ է…

Ալի Ապշերոնի

Երիտասարդության տեսանկյունից կյանքը՝ դա անվերջ ապագա է, ծերության տեսանկյունից՝ շատ կարճ անցյալ:

Արթուր Շոպենհաուեր

Իմ կյանքի փորձը համոզել է ինձ, որ պակասություններ չունեցող մարդիկ շատ քիչ արժանիքներ ունեն:

Աբրահամ Լինկոլն, ԱՄՆ 16-րդ նախագահ

Կյանքը բնության հորինվածքներից ամենահրաշալին է:

Գյոթե

Կյանքը՝ ինչպես հեծանիվ քշելը: Որպեսզի պահես հավասարակշռությունդ, պետք է անընդհատ շարժվես:

Ալբերտ Էյնշտեյն

Կյանքը իսկականից գեղեցիկ է միայն այն ժամանակ, երբ նրանում տեղ է գտել ողբերգությունը:

Թեոդոր Դրայզեր

Կյանքը՝ ինչպես Երկիր մոլորակը: Մի օրում կարող է 360 աստիճանով շուռ գալ:

Անհայտ հեղինակ

Մի երաժիշտ, երբ 20 տարեկան էր, առանց տատանվելու բացականչում էր. «Միայն ես»: 25 տարեկանում արդեն արտահայտվում էր ավելի զուսպ. «Ես և… Մոցարտը»: Երեսունում դարձավ շրջահայաց. «Մոցարտը և… ես»: Եվ միայն հասունության հետ վստահություն ձեռք բերեց. «Միայն Մոցարտը»:

Այլաբանություն

Առանց թշնամիների իմ կյանքը կլիներ շատ տխուր, ինչպես դժոխքում:

Ռիչարդ Նիքսոն, ԱՄՆ նախագահ

Անցյալի վրա մի կրակիր ատրճանակով, քանզի ապագան կկրակի քեզ վրա թնթանոթից:

Այլաբանություն

Համբերությունը ողջ կյանքի հարստությունն է:

Ճապոնական իմաստություն

Մենք այստեղ ենք, որպեսզի մեր ավանդն ունենանք այս աշխարհում: Հակառակ դեպքում մենք այստեղ ի՞նչ ենք անում: Սթիվ Ջոբս

Վերջ ի վերջո ամեն մարդու տրված է միայն մեկ կյանք. այդ դեպքում ինչո՞ւ այն չապրել ինչպես հարկն է:

Ջեկ Լոնդոն

Եթե մարդ սկսում է հետաքրքրվել կյանքի իմաստով կամ դրա արժեքով, նշանակում է նա… հիվանդ է:

Զիգմունդ Ֆրեյդ

Ապրում ես միայն մեկ անգամ:

Գյոթե

Մարդու իսկական կոչումը ապրելն է, այլ ոչ թե գոյություն պահելը:

Ջեկ Լոնդոն

Միայն նա է արժանի կյանքի և ազատության, ով ամեն օր նրանց համար գնում է մարտի:

Գյոթե

Զարմանալի է կառուցված մարդը. նա սգում է, երբ կորցնում է հարստությունը և անտարբեր է, երբ անվերադարձ անցնում են իր կյանքի օրերը:

Աբուլ Ֆարաջ

Կարողանալ հաճույք ստանալ ապրած կյանքից՝ նշանակում է ապրել երկու անգամ:

Մարցիալ

Կյանքի նպատակը պետք է լինի երջանկությունը, այլապես կրակը չի վառվի բավականաչափ պայծառ, շարժող ուժը չի լինի բավականաչափ հզոր, և հաջողությունը չի լինի լրիվ:

Թեոդոր Դրայզեր

Ես կարծում եմ, որ միշտ էլ արժե փրկել մարդկային կյանքը, ինչպիսի մարդ էլ որ լինի:

Բեռնարդ Շոու

Կյանքը պայքար է:

Եվրիպիդոս

Կյանքն այնպես սատանայորեն է կառուցված, որ չկարողանալով ատել, հնարավոր չէ անկեղծորեն սիրել:

Մաքսիմ Գորկի

Կյանքն ընթանում է. ով չի հասցնում նրա հետևից, մնում է միայնակ:

Մաքսիմ Գորկի

Քարոզ պետք է լինի մեր կյանքը, այլ ոչ թե խոսքերը:

Թոմաս Ջեֆերսոն

Ով չի գնահատում կյանքը, արժանի չէ նրան:

Լեոնարդո դա Վինչի

Կյանքը լեռ է՝ բարձրանում ես կամաց-կամաց, իջնում ես միանգամից:

Գի դե Մոպասան

Ինչ է մարդկային կյանքը: Սկզբի մեկ երրորդը՝ լավ ժամանակ է, մնացածը՝ դրա մասին հիշողություններ:

Մարկ Տվեն

ԼՌՈՒԹՅՈՒՆԸ ՀԱԶԱՐ ԱՐԺԵ

HAYQRISTONEA — Mon, 04 Mar 2013 07:46:38 GMT

(Բիրմայի ժողովուրդների հեքիաթներից)

Վաղնջական ժամանակներում առյուծը երեք հազար անտառների թագավոր էր:Նա աղվեսին կնության վերցրեց, և շուտով նրանք որդի ունեցան: Արտաքին տեսքով նա լրիվ նման էր առյուծի, բայց ոչ թե առյուծի պես մռնչում, այլ աղվեսավարի հաչում էր: Երբ որդին սկսեց մեծանալ, հայր-առյուծը նրան կանչեց իր մոտ և ասաց.
- Որդի՛ս: Դու մարմնով մեծ և ուժեղ ես, բայց քո աղվես մորից արհամարհանքի արժանի ձայն ես ժառանգել: Քո ձայնում հզորություն չկա, և այն չի սազում իմ արքայական ժառանգորդին: Եթե դու աղվեսավարի հաչես, գազանները քեզ հետ հաշվի չեն նստի: Այդ պատճառով էլ ավելի լավ է լռի՛ր և ձայն մի՛ հանիր: Այդ դեպքում ես կկարողանամ հազար անտառ նվիրել
Որդին հիշեց առյուծ- հոր խրատը: Բայց մի անգամ այնպես ստացվեց, որ նա խախտեց այդ արգելքը: Մի անգամ շատ գազաններ էին հավաքվել, և առյուծի որդին ցանկացավ ինչ-որ բան ասել: Նա չդիմացավ, մոռացավ հոր խրատն ու աղվեսավարի բարձր հաչաց:
Երբ գազանները լսեցին այդպիսի մեծ և ուժեղ գազանի աղվեսավարի բարալիկ ու սուր հաչոցը, նրանք համերաշխ ծիծաղեցին: Այդ ժամանակ հայր-առյուծը որդուն ասաց.
- Որդի՛ս, եթե դու կատարեիր իմ խորհուրդն ու լռեիր, դու հազարավոր անտառներ կստանայիր: Բայց դու չկարողացար սանձել քո շատախոսությունը: Դու արժանի չես այդ այդ անտառներին:
Առյուծի որդին այդպես էլ հազարավոր անտառներ չստացավ, իսկ մարդիկ այդ ժամանակվանից սկսեցին ասել. «Լռությունը հազար արժե»:

Հանկարծ ու սխալ բան չանեմ սեղանի շուրջ

HAYQRISTONEA — Tue, 26 Feb 2013 07:25:20 GMT

Միացյալ նահանգների պրեզիդենտ Կալվին Կուլիջը մի անգամ մի խումբ բարեկամների ընթրիքի էր հրավիրել Սպիտակ տուն: Անհանգստանալով, որ հանկարծ որևէ վրիպում թույլ չտան սեղանի շուրջը, հյուրերը որոշեցին ամեն ինչում ընդօրինակել Կուլիջին: Նրանց ստրատեգիան արդարացնում էր իրեն այնքան ժամանակ, մինչև սուրճ մատուցեցին: Պրեզիդենտը սուրճը լցրեց ափսեի մեջ: Հյուրերը նույն բանն արեցին: Կուլիջն ափսեի մեջ շաքար ու սերուցք ավելացրեց: Հյուրերը կրկնեցին նույն բանը: Այնուհետև Կուլիջն ափսեն դրեց հատակին` իր կատվի առջև:
/Էրիկ Օլսոն/

Ապրելու Արվեստը, գիրք 8
Հրաչյա Ամիրյան

ՍԻՐՈ ԱՌԱՍՊԵԼՆԵՐ

HAYQRISTONEA — Thu, 21 Feb 2013 16:55:10 GMT

Ձեր սիրտը կատաղի տրոփում է, շունչն էլ կտրվո՞ւմ է:

- Դա Սեր չէ, դա Համակրանք է...
Ձեզ համար դժվար է նույնիսկ ֆիզիկապե՞ս կտրվել իրարից:
- Դա Սեր չէ,դա Տռփանք է...
Դուք հպարտանում եք Ձեր զուգընկերոջո՞վ (զուգընկերուհիով):
- Դա Սեր չէ, դա Հաջողություն է...
- Դուք ցանկանո՞ւմ եք միշտ լինել Ձեր զուգընկերոջ (զուգընկերուհու) հետ:
- Դա Սեր չէ, դա Միայնակություն է...
-Դուք նրա հետ եք, որովհետև այդպե՞ս է պետք:
- Դա Սեր չէ, դա Նվիրվածություն է...
Դուք նրան աջակցում եք միայն, որպեսզի չնեղացնե՞ք նրան:
- Դա Սեր չէ, դա Խղճահարություն է...
Դուք նրա կողքին եք, որովհետև դրա հետ ոչինչ չե՞ք կարող անել:
- Դա Սեր չէ, դա ուժեղ Հակում է...
Դուք ներում եք նրա բոլոր սխալնե՞րը:
- Դա Սեր չէ, դա Ընկերություն է...
Դուք ամեն օր պնդում եք, որ նա միակն է, ում մասին դուք միշտ մտածո՞ւմ եք;
- Դա Սեր չէ, դա Կեղծիք է...
- Դուք պատրաստ եք ամեն ինչ տալո՞ւ հանուն նրա:
- Դա Սեր չէ, դա Գթասրտություն է...
Լսե՛ք, այդ դեպքում ի՞նչ է Սերը:

Խրատաբանության օգուտը

HAYQRISTONEA — Thu, 21 Feb 2013 12:52:38 GMT

Կանանց քոլեջի կին դեկանը նոր ընդունված ուսանողուհիներին ներկայացնում էր մնացածներին: Նա որոշեց, որ տեղին կլինի անդրադառնալ նաև սեքսի և բարոյականության թեմային.
-Գայթակղության պահերին ամեն անգամ ըմդամենը մեկ հարց տվեք ինքներդ ձեզ. «Արժե՞ արդյոք մեկ ժամվա հաճույքը փոխել մի ամբողջ կյանք տևող խայտառակության հետ»:
Դասախոսության ավարտին, նա ներկաներին հարցրեց` արդյո՞ք հարցեր ունեն իրեն տալու:
Աղջիկներից մեկը երկչոտությամբ ձեռք բարձրացրեց և հարցրեց.
-Դուք չեք կարող արդյոք պատմել, թե ինչպե՞ս է ձեզ հաջողվում ձգել դա մի ամբողջ ժամ: