Ապրիլի 10-ին, Մայր Աթոռ Սուրբ Էջմիածնի Գևորգյան հոգևոր ճեմարանի հանդիսությունների սրահում, Ն. Ս. Օ. Տ. Տ. Գարեգին Բ Ամենայն Հայոց Հայրապետի օրհնությամբ և հանդիսապետությամբ, Հոգևոր-կրթական բարձրագույն հաստատությունների վերատեսուչ Տեր Գևորգ եպիսկոպոս Սարոյանի, Եկեղեցական հայեցակարգային հարցերի գրասենյակի տնօրեն Տեր Բագրատ եպիսկոպոս Գալստանյանի, “Մանանա” երիատասարդական ծրագրի պատասխանատու սարկավագների նախաձեռնությամբ տեղի ունեցավ Մեծ Պահքին նվիրված «Ապաշխարություն և Հաշտություն» խորագիրը կրող խոկման երեկոն: Մեծ Պահքի ընթացքում ամեն հինգշաբթի Սբ. Գայանե եկեղեցում տեղի ունեցած խոկման արարողություններն ամբողջացան այս ինքնատիպ ձեռնարկումով, որի հիմնական իմաստը երիտասարդության անմիջական ներգրավվածությունն էր: Երեկոյի ընթացքում երիտասարդների կողմից ընթերցվեցին հատվածներ Սուրբ Գրքից և Եկեղեցու հայրերի խրատներից ու աղոթքներից, հնչեցին Ապաշխարության շարականներ` կատարմամբ Գևորգյան Հոգևոր ճեմարանի և «Հավատամք» ու «Կանթեղներ» երգչախմբերի: Այնուհետև, շուրջ 700 երիտասարդներին և ներկաներին իր հայրական օրհնությունը փոխանցեց Վեհափառ Հայրապետը: Նորին Սրբությունը իր խոսքում մասնավորապես շեշտեց, ապաշխարության այս շրջանին բարության մեջ ապրելու ձգտումը՝ մեր մտածումներով, մեր աշխատանքով ու ձեռնարկներով: Սիրո և հաշտության գիտակցությամբ միմյանց օգնելու և աջակցելու զգացումը, աղոթքով ու ջերմությամբ՝ Տիրոջ ներկայությամբ և առաջնորդությամբ մեր կյանքը լցնելու ճշմարտությունը: Վեհափառ Հայրապետը ներկաներին կոչ արեց նաև մասնակից դառնալ սիրիահայերին աջակցող օգնության այն ձեռնարկներին, որ իրականցվում են տարբեր կազմակերպությունների կողմից և նաև աղոթքներում հիշել նրանց` հայցելով Երկնավորից, որ խաղաղության իր շնորհները հեղի նրանց վրա: Վեհափառ Հայրապետը միջոցառման իրականացման համար իր հայրական գնահատանքը և օրհնությունը հայտնեց նախաձեռնությունն իրականացրած հոգևորականներին և բոլոր կազմակերպիչներին ու մասնակիցներին: Ավագ Շաբաթի մեծ խորհուրդին և Սուրբ Հարության հաղթանակին ընդառաջ այս աղոթական մթնոլորտը նորովի լիցք հաղորդեց մեր երիտասարդներին, ապրելու Աստծո անսպառ շնորհների և օրհնության ներքո, հավատարիմ մեր հայրերի սուրբ հավատքին և մեր ժողովրդի հավերժուտյան ձգտող ինքնության տեսիլքին:
|
Main / Blog 
