 Ապրիլի 5-ին` ժամը 12:00-ին, ԱՀԹ Սուրբ Սարգիս եկեղեցու «Արարատ» հոգևոր միության և ԵՀԽ Հայաստանյան Կլոր սեղան հիմնադրամի նախաձեռնությամբ, Նար Դոսի անվան թիվ 14 դպրոցում տեղակայված Կիլիկյան վարժարանի սիրիահայ երեխաների համար կազմակերպվել էր Սուրբ Աստվածածնի Ավետման տոնին նվիրված միջոցառում:
«Արարատ» հոգևոր միության հոգևոր հովիվ Տեր Հակոբ քահանա Խաչատրյանը ողջունեց ներկաներին, խոսեց յուրաքանչյուրի կյանքում եկեղեցու կարևորության մասին, ինչպես նաև Ավետման տոնի խորհրդից, և կարևորեց բարեխոս Տիրամորն ուղղված մեր աղոթքները:
Այնուհետև համերգային ծրագրով հանդես եկան ԱՀԹ «Արարատ» հոգևոր միության «Արարատ» երգչախումբը և «Արարատ» պարախումբը ` կատարելով հոգևոր, ազգային, ժողովրդական երգեր և պարեր:
ԵՀԽ Կլոր սեղան բարեգործական հիմնադրամի հայաստանյան գրասենյակի տնօրեն Կարեն Նազարյանն իր խոսքում նշեց, որ այս համերգային ծրագիրը կազմակերպվել է հենց Կիլիկյան վարժարանում, որովհետև ևս մեկ անգամ ցանկություն կար հանդիպելու սիրիահայ երեխաներին. «Սա , իհարկե, շարունակական բնույթ կկրի: Այսօրվա համերգից շատ տպավորված եմ. պրոֆեսիանալ երգչախումբ ու պարի խումբ էր, և որ ամենակարևորն է, բոլորը բեմի վրա ժպտում էին. դա նշանակում է, որ սիրով են անում իրենց գործը»:
Կիլիկյան վարժարանը հիմնական դպրոց է, որտեղ սովորում են առաջինից մինչև իններորդ դասարանի 300 աշակերտ: Մինչ հիմա հայրենիքի պատմությանն ու մշակույթին գրքերից ծանոթ երեխաները, այսօր արդեն ականատեսն ու մասնակիցն են նրա առօրյային: Իսկ նման միջոցառումները ավելի են ակտիվացնում երեխաների կյանքը:
Վարժարանի տնօրեն Նորա Փիլիպպոսյանն իր շնորհակալությունը հայտնեց համերգի կազմակերպիչներին. «Մենք ծանոթ էինք հայկական երգարվեստին ու պարերին, այսօր նաև ակատեսը եղանք դրանց: Երեխաներն էլ, ես էլ, շատ զգացված ենք, որովհետև անչափ սիրում ենք ազգային երգն ու պարը և փափագում ենք, որ այսպիսի ձեռնարկները հաճախ լինեն»,- նշեց օրիորդ Նորան, շեշտելով, որ իրենք անհամբեր կսպասեն «Արարատ» միության հաջորդ այցին:
|
Main / Blog 
