Շուրջ մեկ ամիս առաջ տեղի ունեցավ «Սիրո, Հավատքի և Հավատարմության» Ուխտերթը քաղաքամայր Երևանից դեպի Մայր Աթոռ Սուրբ Էջմիածին: Ուխտերթը կազմակերպել էին եկեղեցական և հասարակական տարբեր կառույցների ու կազմակերպությունների երիտասարդ ներկայացուցիչները` առաջնորդությամբ Մայր Աթոռի Հայեցակարգային Հարցերի Գրասենյակի Տնօրեն Գերաշնորհ Տեր Բագրատ Եպիսկոպոս Գալստանյանի: Նոյեմբերի 17-ին նախաձեռնող խմբի մասնակից երիտասարդները, Վեհափառ Հայրապետի օրհնությամբ, ուխտաբար եղան Վայոց Ձորի թեմի մի քանի եկեղեցիներում: Այդ օրը նաև Ջերմուկի քաղաքի Սուրբ Գայանե եկեղեցու ուխտի օրն էր, որտեղ էլ մատուցվեց Սուրբ և անմահ Պատարագ, որին մասնակցեցին ուխտավոր երիտասարդները: Պատարագի ընթացքին ուխտավոր հավատացյալներին իր պատգամը փոխանցեց Բագրատ Սրբազանը` քարոզի բնաբան ընտրելով «Ձեզանից ով որ ուզում է առաջին լինել, թող ծառա լինի» (Մատթ. 20։20–28) ավետարանական խոսքը. «Առանց ծառայության, տեր լինելու ցանկությունը սուտ է և կեղծ, ծառայությունը խոնարհություն անելու մեջ է, չի կարելի որևէ բանի տեր լինել, եթե չես ծառայում նրան: Մենք մեր Տիրոջ մեջ տեսնում ենք խոնարհություն, նրա ծառայությունը գալիս էր տառապանքների մեջից, մինչև սիրո խաչը, բայց մենք նրան ծառա չենք ասում, այլ Տեր»,- ասաց Սրբազան Հայրը: Երիտասարդները եղան նաև Սուրբ Տրդատ, Սուրբ Աննա, Սուրբ Խաչ և Սուրբ Նշան եկեղեցիներում` ամենուր աղոթելով մեր Հայրենիքի, Հայ Առաքելական Սուրբ Եկեղեցու և հայ ժողովրդի համար: Ուխտին մասնակցող երիտասարդ երկրապահների նախաձեռնությամբ ծաղիկներ դրվեցին Ջերմուկ և Եղգնաձոր քաղաքների Արցախյան պատերազմում զոհված ազատամարտիկների Հուշակոթողին, ապա Սրբազան Հայրը աղոթք առաքեց առ Աստված բոլորի հոգիների խաղաղության համար: Ուխտավորները, վերադառնալով իրենց օջախներ, բերեցին իրենց հետ ողջ օրվա խաղաղությունն ու օրհնությունը: Հեղինե Մարգարյան
|