 «Արարատ» միության «փոքրիկ հարևաններն » այցելել են Մեսրոպ Մաշտոցի գերեզման
«Մեր ընտանիքում եկեղեցի գնալը երբեք էլ պարտավորություն չի եղել: Չգիտեմ, գուցե դա կապված է նրա հետ, որ ապրում ենք Սուրբ Սարգիս եկեղեցու հարևանությամբ»,- նշում է 20 –ամյա Հռիփսիմեն, ով, ինչպես ինքն է ասում, արդեն սովորել է առավոտը դիմավորել աղոթքով ու եկեղեցու զանգերին ականջ դնելով: Այն շենքում, որտեղ ապրում է Հռիփսիմեն, շուրջ երկու տարի է, ինչ գործում է Արարատյան Հայրապետական թեմի «Արարատ» հոգևոր միությունը: Հոգևոր գիտելիքի տարածում ու ամրապնդում. սա է վերջինիս գործունեության հիմնաքարը: Այս նպատակով էլ նոյեմբերի 10-ին միությունն իր «հարևանների»՝ նույն շենքում բնակվող շուրջ 15 երեխաների ու նրանց ծնողների հետ այցելել է Օշականի սուրբ Մեսրոպ Մաշտոց եկեղեցի:«Արարատ» միության ամենափոքր «հարևաններից» մեկը 8-ամյա Աննան է:
Դպրոցում արդեն հասցրել էր լսել ու կարդալ Մաշտոցի մասին, բայց առաջին անգամ էր այցելում Օշական. «Մայրիկս միշտ գնում է պատարագների, ինձ էլ հետը տանում է, - նշում է Աննան, - շատ ուրախ եմ, որ ապրում եմ եկեղեցու կողքին»: Տերունական համատեղ աղոթքից ու Մեսրոպ Մաշտոցի գերեզմանին խո- նարհվելուց հետո, երեխաները ստացան նաև եկեղեցու հոգևոր սպասավորի օրհնությունը. «Մաշտոցն աստվածապաշտ ու անձվիրյալ կենսագրություն ունի: Համոզված եմ՝ բոլորդ էլ ձեր ներքին զգացումներն ու ապրումներն եք ունենում, երբ իջնում ու կանգնում եք Սուրբի գերեզմանի առջև,- նշեց Տեր Հայրը, կարևորելով նաև այն փաստը, որ այս տարիքից հենց երեխաները համա-խմբվել են եկեղեցու շուրջ:
Նշենք, որ իր «հարևանների» հետ սուրբ վայրեր այցելելը «Արարատ» հոգևոր միության համար արդեն բարի ավանդույթ է դարձել: Նախորդ անգամ միության նախաձեռնությամբ երեխաներն ուղևորվել էին Մայր Աթոռ Սուրբ Էջմիածին:
Նելլի Մովսիսյան
|
Main / Blog 
