Քրիստոնեության կարևորագույն Ավետիսներից` Հիսուս Քրիստոսի ծննդյան և Հրաշափառ Հարության տոներից հետո սկսվում են տնօրհնյաց արարողությունները:                                        

Մարտի 31-ին Սուրբ Հարության տոնի Ս. Պատարագից հետո  «Արարատ» հոգևոր միության հոգևոր հովիվ Տեր Հակոբ քահանա Խաչատրյանը և համանուն երգչախումբն ու պարի խումբը  հյուրընկալվեցին  «Վահագնի» թաղամասում` Տնօրհնյաց արարողություն կատարաելու և մեր Տեր ու Փրկիչ Հիսուս Քրիստոսի  հարության Բարի ավետիսը թաղամասի բնակիչներին փոխանցելու. «Թաղամասային օրհնություններն  ավելի շատ բացման` նավակատիքի արարողություն են  եղել` հիմնօրհք: Տնօրհնեքի արարողություն, որպես այդպիսին, մեր իրականության մեջ  քիչ է, իսկ այս նախաձեռնությունը պայմանավորված է Հովնանայան ընտանիքի եկեղեցասիրությամբ: Հովնանյան  ընտանիքը ցանկացել է, որ Քրիստոսի Ս. Հարության տոնի արարողությունը ներկայություն դառնա նաև իրենց  թաղամասի բնակիչների համար` օրինակ  ծառայելով մյուսներին, որպեսզի ամբողջ  թաղամասում կյանքը հոգևոր և ճիշտ հարաբերություններով ընթանա: Այսօր մեր շնորհավորանքն  ենք  բերել թաղամասի բնակիչներին, հայտնելով, Քրիստոս հարեավ ի մեռելոց, օրհնյալ է Հարությունը Քրիստոսի,-ասաց Տեր Հակոբ քահանա Խաչատրյանը»:

Թաղամասում ապրում են տարբեր ազգերի ներկայացուցիչներ, որոնք նույնպես ներկա էին Տնօրնեքի արարողությանը:

Միջոցառումը, որն իր բնույթով աննախադեպ էր, կոչված  էր ազգային-եկեղեցական տոները շրջանառելու և ներկայություն դարձնելու և որն  այսուհետ  շարունակական բնույթ կկրի,  կազմակերպել էր Հովնանյան ընտանիքը:

Տնօրհնեքն առանձնանում էր նրանով, որ օրհնվում էր ոչ թե կոնկրետ բնակարան, այլ ամբողջ թաղամասը: «Արարատ» հոգևոր միության հոգևոր հովիվը նշում է, որ յուրաքանչյուր մի մարդ, քրիստոնյա լինելով, պարտավորություն է առնում իր ուսերին` իր հոգևոր համոզումները քարոզելու և փոխանցելու այլոց. «Արարատ» հոգևոր միության գործունեությունն էլ խարսխված է հետևյալ իրականության վրա` զորանալ հոգևոր գիտելիքով և փոխանցել հոգևոր գիտելիքը, կամ հոգևոր զգացողությունը, յուրաքանչյուրն իր կարողությամբ և իր ոլորտով, այս դեպքում էլ երգչախումբը, պարախումբը, լրագրողների խումբը և մյուս ներկաներն  այս ձեռնարկով վկայում են, որ մենք  եկեղեցին ներկայացնում ենք մեր պարտավորությունների շրջանակներում և  այն տնտեսությամբ որ Աստված մեզ տվել է»:

 Սա «Արարատ»  հոգևոր միություն  հերթական նախաձեռնություններից էր, երգչախմբի ու պարախմբի մասնակցությամբ, այց,  որը թաղամասում կազմակերպված  Սուրբ Հարության տոնի միջոցառումն  ավելի գեղեցկացրեց: