Այսօր ԱՀԹ-ի Առաջնորդարանի դահլիճում  տեղի ունեցավ Հայ Առաքելական Եկեղեցու մասին տեղեկություններ հաղորդող Qahana.am  վերաթարմացված կայքի շնորհանդեսը:  2003 թվականից գործող կայքում այժմ ավելացվել են նոր բաժիններ:

«Մարդիկ սիրում  են հորոսկոպ ընթերցել, սակայն հարոսկոպն ընդունված չէ Հայ Եկեղեցու կողմից: Այդ պատճառով կայքում բացվել է նոր բաժին` « Օրվա Խորհուրդ և ճաշու ընթերցվածք», որն ամեն օր թարմացվում է, և մարդիկ կարող են կարդալ տվյալ օրվա հոգևոր պատգամը և սուրբգրային ընթերցանությունը»,-ասում է Qahana.am-ի հեղինակ և համակարգող Էլիզա Մանուկյանը:

Կայքում  ստեղծված են բազում հնարավորություններ` Աստվածաշունչն էլ ավելի հեշտ հասկանալու և ըմբռնելու համար: Օրինակ, «Աստվածաշունչը շարժական միջոցների համար» էջը  հնարավորություն կտա Ս. Գիրքը բեռնել և կարդալ բջջային հեռախոսի կամ պլանշետային սարքերի միջոցով:

Կայքում բացվել է նաև «Մանուկների համար էջ», որտեղ տեղադրված են մանկական հաղորդումներ, ձայնահեքիաթներ: Կա մանկական գրադարան` նախատեսված տարբեր տարիքի երեխաների համար, ինչպես նաև` «Ինչուիկ» բաժինը, որը հարցերի ու պատասխանների միջոցով կօգնի երեխաներին սովորել քրիստոնեության պատմությունը:

Եռալեզու Qahana.am-ում բացվել է «Սկսնակների համար» բաժին` «Նոր Կտակարանի և առակների մեկնություններ», «Պատկերասրահ», «Ձայնադարան», «Տեսադարան» «Հեռուստահաղորդումներ», «Հոդվածներ», «Հգոևորականներին դիմելաձևեր», «Նորություններ» և այլ էջերով, իսկ հոգևոր ժամանցը կազմակերպելու նպատակով ստեղծվել է «Հանելուկ, խաչբառ» էջը:

Քանի որ Հայ Առաքելական Եկեղեցու տոները շարժական են, կայքում հաշվարկված և տեղադրված են տոները` մինչև 2030 թվականը:

Շնորհանդեսին ներկա էր  ՀՀ վարչապետ Տիգրան Սարգսյանը, ով հանդիսանում է նաև ԱՀԹ թեմական խորհրդի ատենապետը, ԱՀԹ-ի Առաջնորդական փոխանորդ գերաշնորհ Տ. Նավասարդ արքեպիսկոպոս Կճոյանը, հոգևորականներ, լրագրողներ, հյուրեր: